Migrant Of The West: Maryam Jameelah

مغرب کی مہاجرہ: مریم جمیلہ

عائشہ جاوید

  ayeshajaved@eeqaz.org

أَوَلَمْ يَكُن لَّهُمْ آيَةً أَن يَعْلَمَهُ عُلَمَاءُ بَنِي إِسْرَائِيلَ(الشعراء: 197’’کیا ان کیلئے یہ نشانی نہ ہوئی کہ اس قرآن /نبی کو بنی اسرائیل کے علماء پہچانتے ہیں‘‘) نیویارک کے ایک یہودی گھرانے کی عالمہ فاضلہ خاتون جو اپنی ایک کتاب میں لکھتی ہے کہ اسکا خاندان گورا (اشکنازی) یہودی نہیں بلکہ مشرقی (بنی اسرائیلی) ہے۔ جب یہ خاتون تن تنہا سات سمندر پار کرکے (ھجرۃ الی اللہ ورسولہ) لاہور آئی تو ایک کنواری لڑکی تھی! خدا کی یہ نشانی اور قرآن و محمد صلی اللہ علیہ وسلم کی صداقت پر ایک منہ بولتی برہان، ایک عظیم مصنفہ، مہاجرہ، نیویارک کی ماڈرن زندگی کو خیرباد کہہ کر آپکے سنت نگر میں بڑے عشروں تک آپکی پڑھی لکھی، ماڈرن، انگریزی کو منہ مارتی نسل پر خدا کی حجت قائم کرنے کیلئے مقیم رہی۔ ہماری تحریکوں کی بدقسمتی، کہ جہاں خدا کی نصرت کے دیگر بےشمار نظریاتی عوامل بےقدری کی نذر ہوتے ہیں، وہاں یہ خاتون بھی گوشہ نشینی کے ان گنت سال گزار کر خدا کو پیاری ہوئی بغیر اسکے کہ ہماری نوجوان نسل کو اس سے خاطرخواہ استفادہ کرایا گیا ہوتا۔ کتابیں تو وہ بیچاری نیویارک میں بیٹھ کر بھی لکھ سکتی تھی؛ ایسا اعلیٰ سرمایہ لاہوریوں کے کس کام کا! جو خدا کو منظور۔ اسکی انگریزی تحریروں کے قدردان دنیابھر میں پائے گئے؛ صرف چراغ تلے اندھیرا رہا! ایسا اندھیرا کہ سنت نگر کے اس محلے میں جب ہم اس خاتون کی چارپائی کو کندھا دینے کا شرف حاصل کرنے پہنچے تو ساتھ کی مسجد میں جنازے کیلئے اعلان ہورہا تھا ’’حضرات یوسف خان کی اہلیہ جو قضائے الٰہی سے...‘‘! محلہ اس خاتون کے جنازے میں آنے کیلئے شاید یہی حوالہ سمجھ سکتا تھا...! اور میں سوچ رہا تھا اس خاتون نے اگر اپنی ہجرت کیلئے مکہ، قاہرہ، دمشق یا صنعاء کو چنا ہوتا تو خدا کی یہ جیتی جاگتی نشانی اپنے شہر کیلئے کیا اتنی ہی گمنام ہوتی! رحمھا اللہ رحمۃً واسعۃ__ مدیر ایقاظ

وہ خدا کی ایک نشانی تھی۔نیویارک کے ایک ٹھیٹ یہودی خاندان کی عالمہ، ایک بہت بڑی مستشرق ،کثیر کتابوں کی مصنف ،مارگریٹ مارکس جو قبولِ اسلام کے بعد مریم جمیلہ کے نام سے موسوم ہوئیں اور جو امام مودودیؒ کی دعوت پر پاکستان ہجرت کرآئی تھیں، اور بڑے عشروں سے لاہور میں مقیم تھیں۔مغرب سے طلوع ہونے والا یہ سورج، مریم جمیلہ بروز بدھ 31 اکتوبر شہر لاہور میں وفات پاگئیں۔ انا للہ وانا الیہ راجعون۔

نیو یارک یونیورسٹی میں زیرِ تعلیم ،سیکولر ماحول میں پلی بڑھی اس مجاہدہ کو ۱۹ سال کی کم عمری میں تلاشِ حق کی طلب نے اس قدر بے چین کر دیا کہ انہوں نے اپنے عہد کے معروف علماء کو بذریعہ ءخطوط اپنی الجھنوں سے آگاہ کر کے انکی رہنمائی طلب کی ۔ یہ تشنگی اور تڑپ بارگاہ ِ خداوندی میں قبول ہو گئی ! ۲۷ سال کی عمر میں انہیں مشرف بہ اسلام کا اعزاز حاصل ہوا ۔ کیونکہ انکی پرورش ہی مادیت پرست معاشرے میں ہوئی تھی تو نورِ ہدایت پا لینے کے بعد انہوں نے جدیدیت، سیکولرزم ، دہریت جیسے موضوعات پر قلم اٹھانے کی ٹھانی تاکہ مغرب کے قبیح نظام کی اصلیت کا پردہ چاک کر کے اسلام کے شفاف سرچشمے سے عوام الناس کو متعارف کروایا جا سکے۔اس سلسلے میں مولانا مودودی رحمۃ اللہ علیہ کی روحانی تربیت نے انکی صلاحیتوں کو چار چاند لگائے۔ انہیں راہِ خدا میں دار الکفر سے ہجرت کر کے مسلم سرزمین پر آنے کا شرف بھی حاصل ہوا جو اس دور میں کم لوگوں کے حصے میں آیا کرتا ہے الا من رحم ربی !

تیس سے زائد کتابوں کی مصنفہ ، جو سکول کے زمانے میں پاپ میوزک میں سکون ڈھونڈتی پھرتی تھیں ، انکے قلبِ پریشاں کو اب قاری عبد الباسط عبدالصمد کی خوش الحان تلاوت میں تسکین محسوس ہونے لگی ۔ایک جگہ وہ کہتی ہیں کہ میں کبھی کبھی سوچتی تھی کہ شاید سیدنا بلالؓ کی آواز میں بھی ایسا ہی سوز ہوتا ہو گا!

۱۴ سال کی عمر میں یہودیت ، عیسائیت اور دیگر مذاہب کا مطالعہ کر چکی تھیں۔ لکھنے کی خداداد صلاحیت کا بھی حتی الامکان حق ادا کیا۔ Islam and the West, Islam and Orientalism, Islam in theory and Practice, Islam versus the West, Islam and Modernism انکی کچھ کتب ہیں ، جن میں سے بعض کے تراجم اردو، فارسی، ترکی، بنگالی ، فرنچ اور انڈونیشین زبان میں استفادہ عام کیلئے عمل میں لائے گئے۔ اپنے خاندان کا ہدایت سے نابلد ہونا بہرحال انہیں بیقرار کرتا تھا۔ ہمارے قارئین کرام میں سے بیشتر اس خط سے آگاہ ہونگے جس میں انہوں نے اپنے والدین کو صراطِ مستقیم کی طرف بلانے کی ایک آخری کوشش بھی کی۔ایک جگہ لکھتی ہیں ’ بابا!آپ اکثر مجھ سے کہا کرتے تھے نا کہ آپ کسی روایتی مذہب کو اپنانے کے حق میں نہیں ہیں کہ عقیدہ فی نفسہ جدید سائنس سے متصادم ہے۔اس میں کوئی شک نہیں کہ سائنس نے ہم پر مادی دنیا کے نت نئے افق آشکار کیے ہیں، آرام و آسائشات کی کوئی کمی نہیں چھوڑی ، بہت سی موذی بیماریوں کا علاج بھی دریافت کر دیا ۔ مگر اسی سائنس نے ہمیں زندگی اور موت کے مفہوم سے مکمل طور پر ناآشنا رکھا !کیا یہ ہمیں صحیح اور غلط، اچھائی اور برائی، نیکی اور بدی کا تعین کروا سکتی ہےَ۔ہرگز نہیں! دین ہمیں یہ سب سکھاتا ہے!‘

Islam in theory and practice میں ایک جگہ لکھتی ہیں’ ہر شے اللہ کی ہے، انسان کا کچھ بھی نہیں ہے۔انسان مکمل طور پر اپنے رب کے اوپر منحصر ہے۔سب کچھ جس پر انسان قابض ہے یہاں تک کہ اسکا جسم بھی محض اللہ کی طرف سے اس پر ادھار ہے تاکہ اسے صحیح مصرف میں لائے اگر انسان اس ذمہ داری سے جان چھڑائے گا تو سخت سزا کا مستحق ہو گا۔اللہ کیلئے بطور ایک غلام کے کام کرنے کیلئے اسکو اپنا سب کچھ قربان کرنے کیلئے تیار ہو نا چاہئے ‘

جنازے کے حاضرین کا کہنا ہے کہ انکے شوہر کو بچوں کی طرح بلک بلک کر روتے دیکھا گیا! یہ انکی ذاتی زندگی کی پاکیزگی اور حقوق آشنائی کی زندہ مثال ہے! افسوس ہے تو اس بات پر کہ مغرب کی اس مجاہدہ کی زندگی میں تو ہم انکی وہ قدر نہ کر سکے جس کی یہ مستحق تھیں۔ دعاگو ہیں کہ اللہ کے دربار میں انکی قربانیاں اور اخلاص قبول ہو اور انہیں وہ منزل مل گئی ہو جسکا برزخی اور اخروی زندگی میں ہر سچا مومن متمنی ہوا کرتا ہے جیسا کہ مرحومہ کے اپنے الفاظ ہیں:

’سچے مسلمان کو موت سے خوف نہیں آتا کیونکہ موت ہی وہ واحد راستہ ہے جس سے گزر کر وہ اپنے رب کیساتھ ابدی زندگی کو پا سکتا ہے‘!

اللہ انکے درجات بلند فرمائے ، اپنی جنتوں میں ضیافت عطا کرے اور انکے علمی ترکے کو انکا صدقہ جاریہ بنائے، آمین